မိုးရွာခြင်း လေတိုက်ခြင်းစသည့် မိုးလေ၀သဖြစ်စဉ်များ၊ နွေ မိုး ဆောင်း ရာသီဥတုများသည် လေထုကြောင့် အဓိကပေါ် ပေါက်သည့် သဘာဝအခြင်းအရာများဟု သိရှိကြသည်။ သို့ သော် ယင်းတို့ ဖြစ်ပေါ် ပြောင်းလဲရာတွင် ရေထုသည်လည်း လေထုကဲ့သို့ပင် အရေးပါသည်။
မိုးလေ၀သနှင့်ရာသီဥတုဖြစ်စဉ်များကို မောင်းနှင်နေသည့်စွမ်းအင်မှာ နေရောင်ခြည်အပူဓာတ် ဖြစ်သည်။ ရေမျက်နှာပြင်သည် ကမ္ဘာ့မျက်နှာပြင်စုစုပေါင်း၏ ၇၀ ရာခိုင်နှုန်းမျှ ရှိသည့်အတွက် နေရောင်ကို စုပ်ယူနိုင်သည့် ဧရိယာပမာဏသည် ကုန်းမြေထက်ပိုသည်။ ထို့အပြင် ရေမျက်နှာပြင်၏ အရောင်သည် ကုန်းမြေ၏ အရောင်ထက် ပိုရင့်သဖြင့် နေရောင်ကို စုပ်ယူနိုင်မှုစွမ်းအားသည် ကုန်းမြေထက် ပိုသည်။ ပင်ကိုသဘာဝအားဖြင့် ရေထုသည် လေထုထက် အပူဓာတ်ကို ပိုမိုစုပ်ယူသိုမှီးထားနိုင်စွမ်းလည်း ရှိသည်။ ထို့ကြောင့် များမြောင်လှသော အပူဓာတ်များ၏ပိုင်ရှင် သမုဒ္ဒရာရေထုသည် ကမ္ဘာ့ရာသီဥတုကို ကောင်းစွာ ခြယ်လှယ်လျက်ရှိကြောင်း သိသာပေသည်။
သမုဒ္ဒရာများက စုပ်ယူထားသော အပူဓာတ်သည် ရေထုထဲမှ အငွေ့ပျံတက်လာသော ရေငွေ့များထဲတွင် ပါလာသည်။ ယင်းဖြစ်စဉ်သည် လူ့ခန္ဓာကိုယ်မှ ချွေးထွက်ခြင်းနှင့် တူသည်။ ရေငွေ့များသည် လေတိုက်မှုကြောင့် အမြင့်ပိုင်းသို့ရောက်သောအခါ အေးလာလျက် အငွေ့အဖြစ်မှ အရည်ဘ၀သို့ ပြောင်းကာ မိုးအဖြစ်ရွာကျသည်။ ထိုအခါ အပူဓာတ် လွတ်ထွက်လာပြီး လေထုကို ပူပြင်းစေသည်။ ပူလာသော လေထုသည် စွမ်းအင်မြင့်လာကာ လေပြင်းများ တိုက်ခတ်သည်။ ထိုမှတစ်ဆင့် မုန်တိုင်းများကိုလည်း ဖြစ်ပေါ်စေတတ်သည်။
သမုဒ္ဒရာရေထုသည် မိုးရွာခြင်း မုန်တိုင်းတိုက်ခြင်းတို့ကို ဖန်တီးရာတွင် ပါဝင်သည့်နည်းတူ ကမ္ဘာ့တစ်နေရာရှိ အပူဓာတ်တို့ကို သမုဒ္ဒရာရေစီးကြောင်းများက အခြားတစ်နေရာသို့ သယ်ဆောင်ခြင်းဖြင့် ဆိုင်ရာဒေသများ၏ ရာသီဥတုကို ကြိုးကိုင်ဖန်တီးသည်။ ကုန်းမြေပေါ်တွင် စီးဆင်းနေသော မြစ်များကို မြင်သာသော်လည်း သမုဒ္ဒရာထဲတွင် စီးနေသည့် ရေစီးကြောင်းတို့ကို မမြင်သာချေ။ သို့သော် ရေမျက်နှာပြင်တွင်ရော၊ ရေအောက်အနက်ပိုင်းတွင်ပါ စီးနေသည့် ယင်းရေစီးကြောင်းများသည် ကုန်းမြေပေါ်ရှိ မြစ်များထက်ပင် ထုထည်ကြီးမားသည်။
လေတိုက်ခြင်း၊ ကမ္ဘာလည်ပတ်ခြင်း၊ အပူချိန် မညီမျှခြင်း၊ အငန်ဓာတ် မညီမျှခြင်းတို့ကြောင့် သမုဒ္ဒရာရေသည် ရေစီးကြောင်းများအဖြစ် လှုပ်ရှားလည်ပတ်နေသည်။ သမုဒ္ဒရာရေစီးကြောင်းများအနက် အကြီးဆုံးမှာ ''မဟာရွေ့လျား ခါးပတ်ကြီး''ဟု တင်စားခေါ်ဝေါ်ကြသည့် ကမ္ဘာပတ်ရေစီးကြောင်းကြီး ဖြစ်သည်။ တောင်အမေရိကတိုက် အယ်မဇုန်မြစ်ထက် အဆ ၁၀၀ ခန့်ကြီးသည့် ကမ္ဘာပတ်ရေစီးကြောင်းသည် ကမ္ဘာ့အရှေ့ခြမ်းပစိဖိတ်သမုဒ္ဒရာမှ နေရောင်အပူဓာတ်ကို သယ်ဆောင်၍ စီးဆင်းလာပြီး သြစတေးလျတိုက်၊ အင်ဒိုနီးရှားကျွန်းစု၊ အာဖရိကတိုက်တောင်ဘက်တို့ကို ဖြတ်၍ ကမ္ဘာ့အနောက်ခြမ်း အတ္တလန်တိတ်သမုဒ္ဒရာသို့ရောက်လာသည်။ ယင်းရေစီးကြောင်းတွင် ပါလာသော အပူဓာတ်၏ သက်ရောက်မှုကြောင့် ဥရောပတိုက်၏ အတ္တလန်တိတ်သမုဒ္ဒရာ ကမ်းခြေ၀န်းကျင်အရပ်များသည် ဆောင်းအခါတွင် အနွေးဓာတ်ရသည်။ အနောက်ဥရောပနိုင်ငံများက ယင်းနည်းဖြင့်ရသည့် အနွေးဓာတ်ပမာဏသည် နေရောင်မှရသည့် အနွေးဓာတ်ပမာဏ၏ ၃ ပုံ ၁ ပုံမျှရှိမည်ဟု ခန့်မှန်းကြသည်။ ယင်းသို့ ရေစီးကြောင်းမှ အနွေးဓာတ်ရသော ဥရောပတိုင်းပြည်များနှင့် လတ္တီတွဒ်တစ်တန်းတည်းဖြစ်သော အတ္တလန်တိတ်သမုဒ္ဒရာ၏ ဟိုမှာဘက်ကမ်းရှိ အရပ်များသည် အနွေးဓာတ်မရသဖြင့် ဥရောပတိုင်းပြည်များထက် များစွာအအေးပိုသည်။ မဟာရွေ့လျားခါးပတ် ရေစီးကြောင်းက အချို့ဥရောပတိုင်းပြည်များကို အနွေးဓာတ်ပေးသကဲ့သို့ အမေရိကန်ပြည်အောက်ပိုင်းမှ စီးဆင်းလာသည့် ပင်လယ်ကွေ့ရေစီးကြောင်းက သယ်လာသည့် အပူဓာတ်သည်လည်း ဥရောပမြောက်ပိုင်း နော်ဝေစသည့် တိုင်းပြည်များကို အနွေးဓာတ်ပေးသည်။
မဟာရွေ့လျားခါးပတ်ရေစီးကြောင်းကြီးသည် မိမိ၏ အပူဓာတ်ကို စွန့်ထုတ်ခဲ့ရသဖြင့် ဥရောပတိုက်ကို လွန်သော် ရေအပူချိန် ကျဆင်းလာသည်။ စီးလာရာလမ်းတစ်လျှောက်တွင် အပူဓာတ်ကြောင့် ရေအချို့ အငွေ့ပျံသွားကြသဖြင့် အငန်ဓာတ် ပိုများလာသည်။ ပို၍ သိပ်သည်းလာသည်။ အတ္တလန်တိတ် သမုဒ္ဒရာမြောက်ပိုင်း အိုက်စလန်ကျွန်းအနီးသို့ ရောက်သော် အောက်ခြေမှ ရေများထက် ပိုလေးလာသဖြင့် အောက်ပိုင်းသို့ မြုပ်ဆင်းကာ ရေအောက်ရေအေးစီးကြောင်းအဖြစ်နှင့် သမုဒ္ဒရာကြမ်းပြင်ကိုရှပ်၍ စီးရင်း အာဖရိကတောင်ပိုင်းနှင့် သြစတေးလျအောက်ပိုင်းတို့ကို ဖြတ်၍ ပစိဖိတ်သမုဒ္ဒရာသို့ ပြန်ရောက်သည်။ မူရင်းနေရာသို့ရောက်သောအခါ ရေတို့သည် ပြန်လည်ပူနွေးလာလျက် အပေါ်ပိုင်းသို့ ပြန်တက်ကြသည်။ ဤနည်းဖြင့် ရေတို့သည် ပစိဖိတ်နှင့် အတ္တလန်တိတ်သမုဒ္ဒရာအကြား ရွေ့လျားခါးပတ်ကြီးတစ်ခုသဖွယ် စီးဆင်း၍ သံသရာလည်နေသည်။ ယင်းရေစီးကြောင်း၏ ရွေ့လျားမှုမှာ နှေးကွေးလှသည်။ ရေစီးကြောင်း တစ်ပတ်ပတ်မိရန် နှစ် ၁၀၀၀ ခန့် ကြာသည်။
မဟာရွေ့လျားခါးပတ်ရေစီးကြောင်းဟု ခေါင်းတပ်၍ ပြောသော်လည်း ကမ္ဘာတွင် တစ်ခုနှင့်တစ်ခု အနည်းနှင့်အများ ဆက်နွယ်နေသည့် ရေပေါ်ရေအောက် အခြားရေစီးကြောင်းများလည်း ရှိသေးသည်။ ယင်းတို့သည်လည်း ဆိုင်ရာကုန်းမြေများ၏ မိုးလေ၀သနှင့် ရာသီဥတု အခြေအနေဖြစ်ပေါ်မှုတွင် အကျိုးသက်ရောက်မှု ရှိကြသည်။
မဟာရွေ့လျားခါးပတ်ရေစီးကြောင်းသည် လွန်ခဲ့သော နှစ်ပေါင်း ၁၂၀၀၀ ခန့် ရေခဲခေတ်ကုန်ဆုံးချိန်မှစ၍ အပြောင်းအလဲ မရှိသလောက်ဖြင့် ပုံမှန်လည်ပတ်နေခဲ့သည်။ သို့သော် လွန်ခဲ့သော နှစ်ပေါင်း ၁၅၀ ကျော် စက်မှုတော်လှန်ရေးခေတ်မှ စ၍ ကာဘွန်ဒိုင်အောက်ဆိုက်ဓာတ်ငွေ့များ လေထုထဲ ရောက်လာကာ ကမ္ဘာ့အပူချိန်တက်လာသည်တွင် ရေစီးကြောင်းကြီးသည် ပြောင်းလဲတော့မည်လောဟု အချို့ ပညာရှင်တို့က စိုးရိမ်လာသည်။ အပူချိန်တက်၍ မြောက်ဝင်ရိုးစွန်း အာတိတ်အရပ် ရေခဲပြင်များ အရည်ပျော်ကာ ပင်လယ်သမုဒ္ဒရာများထဲ ပိုမိုစီးဝင်လာခဲ့သဖြင့် မြောက်အတ္တလန်တိတ် သမုဒ္ဒရာရေ၏ အငန်ဓာတ်သည် လျော့နည်းစပြုလာသည်။ အငန်ဓာတ် ယခုထက် ပို၍ ပို၍ နည်းလာလျှင် သိပ်သည်းမှုလည်း နည်းလာသည့်အတွက် ရေစီးကြောင်းသည် အောက်သို့ ငုပ်ဆင်းနေကျ အိုက်စလန်ကျွန်းအနီးတွင် ရေအောက်ပိုင်းသို့ မဆင်းနိုင်တော့သည့် အလားအလာနှင့် ကြုံရနိုင်သည်။ ရေအောက်သို့ မဆင်းတော့လျှင် ရေစီးကြောင်းကြီး ရပ်တန့်ခြင်း နှေးကွေးသွားခြင်းတို့ ဖြစ်လာနိုင်သည်။ သို့ဆိုလျှင် ဥရောပတိုက်အနောက်ပိုင်းကို နွေးစေနေသည့် ရေစီးကြောင်း ရပ်သွားသည့်အတွက် ယင်းဒေသများသည် အေးမြသွားနိုင်စရာ ရှိသည်။ တစ်နည်းဆိုရသော် ကာဘွန်ဒိုင်အောက်ဆိုက်ကြောင့် အခြားကမ္ဘာ့ဒေသအသီးသီးတွင် ပူနွေးလာချိန်တွင် ဥရောပတိုက်မှာမူ ပို၍အေးမြလာနိုင်သည်။
ပညာရှင်အချို့က ကမ္ဘာပူနွေးလာနေမှုသည် မဟာရွေ့လျားခါးပတ်ရေစီးကြောင်းကိုသာမက သမုဒ္ဒရာ၏ အခြားအပိုင်းများကိုပါ ပြောင်းလဲစေကာ တစ်ကမ္ဘာလုံး၏ ရာသီဥတုကိုပါ ထိခိုက်လာနိုင်သည်ဟု စိုးရိမ်နေကြသည်။
|
|
|
|